Cyffuriau

GDAS Drug Support

Isod mae yna awgrymiadau defnyddiol ar gyfer lleihau'r niwed a wneir gan gyffuriau:

Profwch y cyffuriau yr ydych yn mynd i'w cymryd. Mae Wedinos yn darparu gwasanaeth profi sylweddau, a gall unrhyw un yng Nghymru gyflwyno samplau. Gall GDAS gynorthwyo unigolyn sydd am gyflwyno sampl. Ymweld â gwefan
Ymchwiliwch i'r cyffur yr ydych ar fin ei gymryd fel eich bod yn gwybod beth fydd yr effeithiau, y dos cyfartalog, a'r hyn i'w ddisgwyl yn ystod ac ar ôl y profiad.
Cynlluniwch y modd y byddwch yn cyrraedd adref cyn i chi ddechrau ar eich noson.
Dylech osgoi cymryd cyffuriau ar eich pen eich hun. Ceisiwch sicrhau bod yna ffrind gyda chi, a dywedwch wrtho faint yr ydych wedi'i gymryd
Cynlluniwch eich dos ymlaen llaw a chariwch yr hyn yr ydych yn bwriadu ei gymryd gyda chi yn unig. Mae'n haws cymryd mwy nag a fwriadwyd os ydych yn ei gario gyda chi.

Ceisiwch beidio â chymysgu cyffuriau, yn cynnwys alcohol, gan y gall hyn achosi effeithiau peryglus ac anrhagweladwy. Os na allwch osgoi alcohol, ceisiwch gyfyngu ar faint o ddiodydd yr ydych yn eu hyfed, neu dewiswch rai sy'n cynnwys llai o alcohol, ac yfwch ddŵr rhwng eich diodydd.
Dechreuwch trwy gymryd llai o gyffuriau ar y tro, a pheidiwch â’i gor-wneud hi. Ceisiwch aros am ddwyawr cyn cymryd rhagor o gyffuriau.
Sicrhewch fod eich corff wedi'i hydradu, ac yfwch sipiau bach o ddŵr.
Cymerwch seibiannau rheolaidd pan fyddwch yn dawnsio.
Os byddwch yn dechrau teimlo effeithiau negyddol, gallai newid eich amgylchedd helpu. Os yw'r effeithiau yr ydych chi'n eu profi yn rhy gryf, ceisiwch ymlacio ac yfwch sipiau bach o ddŵr/sudd.
Os bydd angen i chi ofyn am gymorth meddygol, byddwch yn onest ynghylch yr hyn yr ydych wedi'i gymryd, a faint.

Ceisiwch gael rhai diwrnodau heb gyffuriau bob wythnos i helpu eich corff i wella.
Mynnwch archwiliadau iechyd rheolaidd sy'n cynnwys profion am heintiau a drosglwyddir yn rhywiol (STIs) a phrofion am feirysau a gludir yn y gwaed (BBVs) e.e. HIV, Hepatitis B a Hepatitis C.

Gall rhannu offer sniffian ledaenu heintiau a feirysau a gludir yn y gwaed, e.e. HIV. Defnyddiwch eich cyfarpar eich hun pan fyddwch yn sniffian cyffuriau.
Dylid osgoi defnyddio arian papur i sniffian gan y gallant achosi briwiau y tu mewn i'ch trwyn, ac nid ydynt yn dafladwy chwaith. Mae gwellt papur yn ddewis da yn lle arian papur.
I atal y powdr rhag achosi difrod pellach ar y tu mewn i'ch trwyn, defnyddiwch ddŵr glân i rinsio eich trwyn ar ôl bod yn sniffian cyffuriau.
Defnyddiwch ffroen wahanol ar gyfer pob dos, a rhowch yr offeryn mor uchel â phosibl yn y ffroen.

Os ydych yn smygu o ffoil, defnyddiwch ffoil glân bob tro. Gall ein cyfnewidfeydd nodwyddau ddarparu hyn.
Dylid osgoi dal mwg yn eich ysgyfaint gan y gall hyn niweidio'r meinwe.
Malwch neu torrwch y cyffur yn ddarnau bach.
Os ydych yn smygu cyffuriau adfywiol gall yr effeithiau fod yn ddwys ond yn fyrhoedlog, a all olygu eich bod yn dyheu am ragor. Ceisiwch aros cyhyd â phosibl rhwng pob dos, neu defnyddiwch amserydd i gadw golwg ar eich defnydd.
Gall rhannu pibellau ledaenu heintiau a feirysau a gludir yn y gwaed. Defnyddiwch eich cyfarpar eich hun yn unig a mynnwch gael eich profi'n rheolaidd am feirysau a gludir yn y gwaed.
Gellir trosglwyddo salwch a heintiau ar y croen hefyd trwy rannu cyffuriau i'w smygu, sigaréts neu bibellau.
Ceisiwch ddefnyddio cerdyn heb ei argraffu ar gyfer stympiau fel nad ydych yn anadlu inc cemegol.
Os ydych yn defnyddio pibell, gadewch iddi oeri cyn ei hailddefnyddio, a daliwch y bibell cyn belled â phosibl oddi wrth y fflam i leihau'r siawns o losgi. Cadwch eich llosgiadau'n lân ac yn sych. Os na fydd eich llosgiadau'n dechrau gwella, neu os byddant yn troi'n goch/llidus, gofynnwch am help meddygol.

Defnyddiwch nodwyddau a chyflenwadau glân yn unig. Mae nodwyddau glân, rhad am ddim ar gael gan gyfnewidfeydd nodwyddau neu gellir eu prynu ar-lein.
Defnyddiwch y nodwydd leiaf posibl y gallwch heb iddi gael ei blocio.
Golchwch y mannau lle'r ydych yn chwistrellu cyn ac ar ôl defnyddio nodwydd.
Hidlwch eich cyffuriau bob amser
Mae nodwyddau'n colli eu hawch ar ôl eu defnyddio unwaith. Defnyddiwch nodwydd ffres os na fyddwch yn gallu dod o hyd i wythïen y tro cyntaf.
Amrywiwch y mannau lle'r ydych yn chwistrellu.
Peidiwch byth â rhannu cyfarpar, gan gynnwys nodwyddau, hidlenni, cynwysyddion, llwyau a dŵr.
Gwaredwch nodwyddau mewn modd cyfrifol. Gellir eu dychwelyd i gyfnewidfa nodwyddau.
Gofynnwch am help meddygol os bydd y fan lle'r ydych yn chwistrellu yn mynd yn boenus, yn dyner neu'n boeth, neu os bydd yna chwydd am fwy nag ychydig ddiwrnodau.

Gellir rhoi powdr mewn capsiwl, ei lapio mewn papur sigarét neu ei gymysgu mewn diod a'i lyncu.
Defnyddiwch bapur sigarét glân neu gapsiwl gel i 'fomio' powdr.
Os caiff ei gymysgu mewn diod, gofalwch eich bod yn defnyddio dos cywir. Marciwch y cwpan/botel i sicrhau nad oes neb arall yn yfed y ddiod yn ddamweiniol, a pheidiwch byth â gadael eich diod heb neb i gadw llygad arni.
Malwch neu gwasgwch y powdr cyn ei ddefnyddio fel ei fod mor fân â phosibl. Bydd hyn yn ei gwneud yn haws barnu maint dos ac yn cyflymu'r broses o'i amsugno i'r corff.
Os ydych yn cymryd tabled, defnyddiwch ddos isel. Dechreuwch trwy gymryd chwarter neu hanner tabled, ac arhoswch am ddwyawr cyn ail-ddosio. Mae rhai tabledi yn cymryd peth amser i ddadelfennu, sy'n golygu y bydd yn cymryd mwy o amser cyn i chi deimlo'r effeithiau.